***

გაგონდება თუ არა

კარალეთის დღეები,

მთბის ლურჯი კამარა

უცხო სამოთხეები?

კიდევ შეგრჩა თუ არა

მხიარული თვალები?

თუ დრომ გადაუარა

და ჩაუქრო ალები?

მივდიოდით მხარდამხარ

და დრო გვეუარესა,

აწ არ ვიცი სადა ხარ

და რომელსა მხარესა.

1916

შინდისის ჭადრებს

ორო ჭადარო, წყვილო ჭადარო,

შემოხვეულნო შუქთა ბადრებით, -

ო, მე არ ვიცი, რას შეგადაროთ,

ან უცხოეთში რად მენატრებით?

კვლავ გახვევიათ ოქროს ზეწარი

და შემოდგომის მკრთალი ბლონდები?

მე, უთვისტომო და გარეწარი,

თქვენ გაგიხსენებთ და დავღონდები.

თქვენთან რბიოდნენ ნათელნი დღენი,

ლოცვა ბავშვური, ფერი გედური,

ახლა რად მესმის შრიალი თქვენი,

როგორც ტირილი და საყვედური?

1917